Umanoy aswang na sumalakay sa isang pamilya sa Brgy Cr. Rubber, pinabulaanan

Hindi isang aswang kundi isang lalaking pinaghihinalaang may deperensya sa pag-iisip ang tinuturong sumalakay sa bahay ng isang pamilya sa Barangay Cr. Rubber Bayan ng Tupi.

Ito ang pahayag ni Punong Barangay Estanislao Orencio na pinabulaanan ang ngayo’y kumakalat sa social media na nagsasabing aswang ang sumalakay umano sa tinitirahan ng tatlong pamilya.

Ang lalaking umano’y may deperensya sa pag-iisip ay mayroong barong-barong na nakatirik malapit sa tirahan ng mga biktima.

Dagdag pa ni PB Orencio, bandang ala una ng madaling araw noong isang araw nang ipaalam sa kanya ang balita.

Pansamantalang lumikas sa mga kamag-anak nila sa Relocation Site, Barangay Kalkam ang mga biktima ngunit bumalik naman ito kalaunan.

Bukod sa sirang pintuan, wala nang naitalang pinsala.