Mga magpapalay bibigyan ng binhi at abono -- Sec. Piñol

Sa taong  2017,  bibigyan ng Department of  Agriculture ng  libreng binhi  at abono  ang  mga magsasaka ng  palay sa  buong bansa.

Ito, ayon kay  Agriculture  Secretary Emmanuel Piñol ay  paunang  hakbang  sa  mga inisyatibo para makamit  ng bansa  ang kasapatan  ng bigas.

Gayunman,  binigyang-diin ng  kalihim na  alinsunod ng kaugaliang Pilipino  na  mag-imbak ng makakain, uubligahin ang mga mabibigyan ng  ayuda na  mag-impok sa bangko ng  halaga  na katumbas ng halaga ng production input na ibinigay ng  pamahalaan.

Sa  ganitong paraan, may  madudukot na  pera ang  mga magsasaka  na pambili  ng magagamit sa sakahan sa  susunod  na  planting  season.

Ginawa ni Secretary  Piñol ang  pahayag  sa  pagtatapos ng 50th Foundation Anniversary at  17th Tnalak  Festival ng South Cotabato kung saan isa  siya sa tatlong panauhing pandangal.

Kaugnay  rito, hinikayat  ni Secretary Piñol ang mga lokal na pamahalaan na tukuyin ang mga production area  at expansion area  sa  palay  sa kani-kanilang  lugar. 

Kailangan  aniya  ito  para makapagpapadala  ang DA  ng  tamang  halaga ng   binhi at  abono sa mga magsasaka.